ދައުލަތުގެ ކުންފުނިތަކުގެ ތެރެއިން އެންމެ މުއްސަނދި އެއް ކުންފުނި، ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) ގެ ބޯޑަށް ޗެއާމަން ކަމަށް މީހަކު އައްޔަން ނުކޮށް، އެ މަގާމު ހުސްކޮށް އޮންނަތާ ތިން މަސް ވާން ކައިރިވެއްޖެ އެވެ.

އެޗްޑީސީގެ ޗެއާމަންގެ މަގާމުގައި ހުންނެވި އަހުމަދު ޒުހޫރު އެ މަގާމުން ވަކިކުރީ މެއި 22، 2024 ގަ އެވެ.

މިނިސްޓަރުކަމާއި ކަސްޓަމްސްގެ ކޮމިޝަނާ ޖެނެރަލްގެ މަގާމާއި ސްޓެލްކޯގެ މެނޭޖިން ޑިރެކްޓަރުކަން ކުރެއްވި ޒުހޫރު އެ މަގާމުން ވަކިކުރީ، އެޗްޑީސީގެ މެނޭޖިން ޑިރެކްޓަލް އިބްރާހިމް ފަޒުލް ރަޝީދުއާ ދެމެދު އުފެދުނު ހިތްހަމަ ނުޖެހުމަކަށް ފަހެވެ.

އޭނާ މަގާމުން ވަކިކުރުމާ ގުޅިގެން ”އަދަދު“ ނޫހާ ވާހަކަ ދެއްކި އެޗްޑީސީގެ އޮފިޝަލުން ވިދާޅުވި ގޮތުގައި ޒުހޫރު މަގާމުން ވަކިކުރުމުގެ މައިގަނޑު ސަބަބަކީ ފަޒުލް ހުށަހަޅާ ބައެއް ކަންކަން ބޯޑުގައި އެޖެންޑާ ނުކުރުމެވެ.

އެޖެންޑާ ކުރަން ޒުހޫރު ދެކޮޅު ހަދާފައި ވަނީ މެނޭޖިން ޑިރެކްޓަރު ފަޒުލްގެ މަސްލަހަތު ފުށުއަރާ ބައެއް ކަންކަމުގެ އިތުރު ތަފްސީލު ހުށަނާޅާތީ ކަމަށް ”އަދަދު“ ނޫހާ ވާހަކަ ދެއްކި ބައެއް ބޭފުޅުން ވިދާޅުވެފައިވެ އެވެ.

އޭގެ އިތުރުން، ރާއްޖޭގެ މައި އެއާޕޯޓު, ވެލާނާ އިންޓަނޭޝަނަލް އެއާޕޯޓު ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޗެއާމަންގެ މަގާމު ވެސް އޮތީ ހުހަށެވެ. އެ މަގާމުގައި ހުންނެވި މުހައްމަދު އުމަރު މަނިކު (އެމްޔޫ މަނިކު) ވަނީ އިސްތިއުފާ ދެއްވާފަ އެވެ.

އެ މަގާމުގައި 10 އަހަރު ދުވަހު ހުންނެވި އެމްޔޫ މަނިކު އިސްތިއުފާ ދެއްވިތާ ހަ މަސް ދުވަސް ވަނީ ވެފަ އެވެ.