ދިވެހިރާއްޖޭގައި ލޭނުގެ މަސްވެރިކަން ނުކުރުމަށް ބުނުމަކީ، ސައުދީ އަރަބިއްޔާގެ މީހުންގެ ކައިރީގައި ތެޔޮ ނުނަގާށޭ ބުނުން ކަހަލަ ކަމެއްގެ ގޮތުގައި މަސްވެރިކަމާޢި ބެހޭ ވުޒާރާގެ ސީނިއަރ ޕޮލިޓިކަލް ޑިރެކްޓަރ ޝުޖުއާން ވިދާޅުވެއްޖެއެވެ.
މިފަދައިން ޝުޖުއާން ވިދާޅުވެފައި ވަނީ ފޭސްބުކްގައި ލޭނުމަސްވެރިކަންކުރުމާއި އެއްކޮޅަށް ކުރެއްވި ޕޯސްޓެއްގައެވެ.
ޝުޖުއާން ވިދާޅުވި ގޮތުގައި މަސްވެރިކަމުގެ ނަފާ ހޯދުމަށް މަސްވެރިކަން ޑައިވާސިފައި ކޮށް ފުޅާކުރަން ޖެހެއެވެ.
ރާއްޖޭގައި ބޮޑު ކަންނެލީގެ ލޭނު މަސްވެރިކަން ކުރުމުގެ ހުއްދަ ދިނުމަށް ވަޒީރުންގެ މަޖިލީހުން ނިންމުމާ ގުޅިގެން އެ މިނިސްޓަރީން އެކުލަވައިލި ގަވާއިދުގެ ދެލިކޮޕީއެއް އާންމުންގެ ހިޔާލު ހޯދުމަށް ވަނީ ޝާއިއުކޮށްފަ އެވެ
އޭގައި ބުނެފައިވާ ގޮތުގައި ލޭނު މަސްވެރިކަން ކުރުމުގައި މިޔަރަށް އަމާޒުކޮށްގެން މަސްވެރިކަން ކުރުމަކީ މަނާކަމެއް ކަމަށެވެ. އަދި ގަވާއިދުގެ ދަށުން ލައިސަންސް ލިބިފައިވާ އުޅަނދެއްގެ ލޭނުކޮޅު (ބްރާންޗް ލައިން) ގެ މިޔަވާލި (ލީޑަރު) ގެ ގޮތުގައި ވަޔަރު ނުވަތަ ނަރު (ވަޔަރު ޓްރޭސް) ބޭނުންކޮށްގެން ނުވާނެއެވެ. އަދި މިފަދަ ތަކެތި އުޅަނދުގައި ބަހައްޓައިގެން ނުވާނެ ކަމަށާއި ލޭނު ބޮޔާ ސީދާ ގުޅޭގޮތަށް އެއްވެސް ބާވަތެއްގެ ބްރާންޗް ލައިނެއް ބޭނުންކޮށްގެން ނުވާނެ ކަމަށް ގަވައިދުގައިވެއެވެ.
ގަވައިދުގައި ބުނީ ލޭނު އަޅާއިރު ލޭނުކޮޅުގައި ޖެހޭ މިޔަރުގެ ތެރެއިން ލޭނު ނަގާއިރު މަރުނުވެ އޮންނަ މިޔަރު ވީހާވެސް އަވަހަށް ދޫކޮށްލަންވާނެ ކަމަށާއި މިގޮތަށް ދޫކުރާއިރު، މިޔަރަށް ލިބޭ އަނިޔާ ކުޑަކުރުމަށްޓަކައި، ބުޅި ނައްޓާ އާލާތް (ޑީ-ހުކަރު) އަދި ލޭނުކޮޅު ބުރިކުރާ އާލާތް (ލައިންކަޓަރު) ބޭނުންކޮށްގެން މިޔަރުގެ އަނގައާ ނުވަތަ ބުޅިއާ ވީހާވެސް ކައިރިން ނަނު ބުރިކޮށްލަންވާނެ ކަމަށެވެ. އަދި ލޭނު އަޅާއިރު ލޭނުކޮޅުގައި ޖެހޭ މިޔަރުގެ ތެރެއިން ލޭނު ނަގާއިރު މަރުވެފައިވާ މިޔަރު ބަނދަރަށް ގެނައުމަށްޓަކައި އުޅަނދުގައި ބެހެއްޓިދާނެ ކަމަށި އެ ފަދަ މިޔަރު ބަނދަރަށް ގެންނައިރު ހުންނަންވާނީ މިޔަރުގެ އެއްވެސް އުރަހައެއް އޭގެ ހަށިގަނޑުން ކަނޑައި އުރަހަތައް ވަކިނުކޮށް ކަމަށެވެ