100 މީހުން ކައިރިން ދިވެހިރާއްޖެއަކީ ކޮން ތަނެއްތޯ ސުވާލުކޮށްފިނަމަ އޭގެ ތެރެއިން 99 މީހުންނަކަށް ރާއްޖެ އަކީ ކޮންތަނެއްކަން ނޭނގޭނެ ކަމަށް މަރަދޫ ދާއިރާގެ މެންބަރު އަޙްމަދު ދީދީ ވިދާޅުވެއްޖެއެވެ.

ރައްޔިތުންގެ މަޖިލީހުގެ ފުރަތަމ ދައުރުގެ 29 ވަނަ ޖަލްސާގައި ވާހަކަ ދައްކަވަމުން އަހްމަދު ދީދީ މިހެން ވިދާޅުވީ ޓޫރިޒަމާއި ގުޅުންހުރި ބިލަކަށް ބަހުސް ކުރައްވަމުންނެވެ.

”މިސާލަކަށް ދުނިޔޭގެ ވަރަށް ބޮޑު ޤައުމެއް ބްރެޒިލްއަކީ. ބްރެޒިލުގައި އުޅޭ 100 މީހުން ކައިރިން ދިވެހިރާއްޖެއަކީ ކޮން ތަނެއްތޯ އަހައިފިއްޔާ 99 މީހުންނަކަށް ނޭނގެ އެއީ ކޮން ތަނެއް ކަމެއް“

އަހްމަދު ދީދީ ވިދާޅުވި ގޮތުގައި ރާއްޖެއަށް ފަތުރުވެރިން ނާންނަނީ އެކަށީގެންވާ ގޮތެއްގައި މާކެޓް ނުކުރެވޭތީ ކަމަށެވެ.

މި މޭރުމުން ވާހަކަ ދައްކަވަމުން އޭނާ ވިދާޅުވީ، ބްރެޒިލް އަކީ ދުނިޔޭގެ ވަރަށް ބޮޑު ޤައުމެއް ކަމަށާއި އެ ޤައުމުގައި 300 މިލިއަން މީހުން އުޅޭއިރު އޭގެ ތެރެއިން 100 މިލިއަން މީހުން ކައިރީގައި ދިވެހިރާއްޖެއަކީ ކޮން ތަނެއްތޯ އަހައިފިއްޔާ 99 މީހުންނަކަށް ނޭނގެ އެއީ ކޮން ތަނެއް ކަމެއް ނޭނގޭނެ ކަމަށެވެ.