ވެލާނާ އިންޓަނޭޝަނަލް އެއާޕޯޓުން މިއަދު ބަންގްލަދޭޝްގެ ވެރިރަށަށް ފުރަން އުޅުނު ބަންގަލަދޭޝްގެ މީހެއްގެ ލަގެޖުގައި ފޮރުވައިގެން ނަގުދު ފައިސާގެ ގޮތުގައި ބޭރުކުރަން އުޅުނު 81،030 ޑޮލަރު ހިފަހައްޓައިފި އެވެ.
ފަތިސް ނޫހަށް މައުލޫމާތު ލިބިފައިވާ ގޮތުގައި އެ މީހާއަކީ އިދިކޮޅު އެމްޑީޕީގެ ޗެއަރޕާސަން ފައްޔާޒު އިސްމާއިލްގެ ޑްރައިވަރެވެ.
އޭވިއޭޝަން ސެކިއުރިޓީ ކޮމާންޑުން ”އެކްސް“ ގައި ކުރި ޕޯސްޓެއްގައި ބުނީ އެ ފައިސާ ހޯދާފައިވަނީ މާލެއިން ޑާކާ އަށް ފުރަން އޮތް ޔޫއެސް ބަންގްލާ އެއާލައިނުން ދަތުރުކުރަން ހަމަޖެހިފައިވާ ފަސެންޖަރެއްގެ ލަގެޖުން ކަމަށެވެ.
ހައްޔަރުކުރި މީހާ ކަމާ ބެހޭ ފަރާތްތަކާ ހަވާލުކޮށްފައިވާ ކަމަށް ސެކިއުރިޓީ ކޮމާންޑުން ބުންޏެވެ.
ވަކި އަދަދަކަށް ވުރެ ގިނައިން ރާއްޖެއިން ބޭރަށް ފައިސާ ގެންދާނަމަ، އެ ފައިސާ ހޯދިގޮތުގެ ތަފްސީލު ހާމަކުރަންޖެހޭ ގޮތަށް ކަސްޓަމްސްގެ އުސޫލު ދާދި ފަހުން ވަނީ އިސްލާހުކޮށްފަ އެވެ.